大爺稱呼呢間野叫"情緒麵" !

"情緒麵", 係我同大爺星期六或日下午常來吃午飯的地方。

上海珍珍排骨麵之所以叫佢做情緒麵, 事原係...

最初, 我同大爺放假有時訓晏咗, 起身係早餐又好似遲咗D, 食午飯又好似早過頭咁, 於是去食碗麵吧!

一入到呢間麵檔, 可能就係未到午市關係, 樓面只有一個亞姐, 落單,水吧,執枱,收錢都係佢。你知啦, 多一兩枱人, 亞姐咪做到陀陀轉, 加黑面啦。你追下佢單或問多兩句, 佢實"得"你, 但有時唔係好多人, 佢又會有D笑容同禮貎。所以去食野, 好多時都要受下佢D不穩定情緒! 正因為呢個原因, 大爺改人地個名叫"情緒麵"

雖然係一檔情緒麵, 但佢碗排骨上海麵, 真係好好味道! 排骨, 其實有骨豬扒, 吃得出薑汁酒的醃料味, 味道剛好, 唔會話一味得個味精同咸字, 沾個粉漿炸起來, 不會死死實實, 亦不會好似吉列豬扒咁參口, 確實係好味!

當然, 除了排骨麵, 還有很多其它選擇, 如: 鮮菇竹笙麵, 上海雲吞麵, 牛腩麵, 上海粗炒等等... 不過無論叫咩麵, 我同大爺都必定會加紫菜腐皮, 咁先覺得滿足!

還有, 食麵必加"辣椒粉", 我同大爺都愛辣

一碗排骨麵加紫菜腐皮, 送熱飲一杯, $27個大洋

佢亦有個套餐, $23, 好抵, 我最鐘意就係沙爹牛肉串麵, 大爺係雞翼人, 一定係要雞翼麵, 再加紫菜腐皮!

地址: 屯門屯利街1號華都花園地下5號舖